Tiranë/ Finalizohet operacioni “Municioni”, arrestohet 64-vjeçari me arsenal armësh dhe uniforma policie

Policia e Tiranës ka përfunduar me sukses operacionin e koduar “Municioni”, duke vënë në pranga shtetasin Arjan Durmishaj, 64 vjeç. Arrestimi i tij u bë pas kontrollit në banesën e ndodhur në rrugën “Pasho Hysa”, ku u gjetën dhe sekuestruan armë, municion dhe sende të tjera të mbajtura në kundërshtim me ligjin.

Sipas burimeve zyrtare, operacioni u bazua në informacionet e siguruara nga inteligjenca policore, që treguan për praninë e sendeve të paligjshme në këtë adresë. Gjatë ndërhyrjes, shërbimet e Komisariatit të Policisë Nr. 1 sekuestruan:

7 karikatorë armësh;

4 armë të ftohta;

1 pistoletë me mulli;

Uniforma dhe mjete që ngjasojnë me ato të Policisë së Shtetit;

Sasi të konsiderueshme municioni.

Të gjitha këto u konstatuan si të mbajtura pa leje nga shtetasi Durmishaj, i cili u arrestua në flagrancë. Ai akuzohet për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Prodhimi, mbajtja, blerja apo shitja pa leje e armëve të ftohta”, si dhe “Mbajtja pa të drejtë e uniformës”.

Materialet procedurale i janë referuar Prokurorisë së Tiranës për hetime të mëtejshme, ndërsa policia po vijon punën për zbardhjen e plotë të këtij rasti dhe për identifikimin e personave të tjerë të përfshirë, nëse ka të tillë.